Jam 2 | NdeIBE | STEP | Bazalwane bami, njengabakholwayo eNkosini yethu elenkazimulo uJesu Khristu, lingabandlululi.

James 2

Ukubandlulula akuvunyelwa

1 Bazalwane bami, njengabakholwayo eNkosini yethu elenkazimulo uJesu Khristu, lingabandlululi. 2 Kasithi umuntu ufika emhlanganweni wenu egqize indandatho yegolide egqoke lezigqoko ezinhle, besekungena umyanga egqoke izigqoko ezinithizelayo. 3 Nxa limnaka kakhulu lowo ogqoke izigqoko ezinhle lithi kuye, “Nansi isihlalo esingcono,” kodwa kongumyanga lithi, “Wena mana laphayana,” kumbe lithi, “Hlala phansi eduze kwezinyawo zami,”

4 kalibandlululanga njalo laba ngabahluleli abalemicabango emibi na?

5 Lalelani, bazalwane bami abathandekayo: Konje uNkulunkulu kabakhethanga yini labo abangabayanga emehlweni omhlaba ukuba babe ngabanothileyo ekukholweni kanye lokudla ilifa lombuso awuthembisa labo abamthandayo na? 6 Kodwa lina libathukile abayanga. Abanothileyo akusibo yini abadinga inzuzo ngani? Akusibo yini abalihudulela emithethwandaba? 7 Akusibo yini abahlambaza ibizo lobukhosi elalowo lina elingabakhe na?

8 Uma liwugcina sibili umthetho wobukhosi otholakala eMbhalweni othi, “Thanda umakhelwana wakho njengalokhu uzithanda,” lenza okulungileyo. 9 Kodwa uma libandlulula lenza isono njalo lilahlwa ngumthetho njengabephuli bomthetho. 10 Ngoba loba ngubani ogcina umthetho wonke kodwa akhubeke endaweni eyodwa, ulecala lokuwephula wonke. 11 Ngoba yena owathi, “Ungafebi,” wathi futhi, “Ungabulali.” Uma ungafebi kodwa ubulala, usube yisaphulamthetho.

12 Khulumani njalo lenze njengalabo abazakwahlulelwa ngumthetho onika ukukhululeka,

13 ngoba ukwahlulela okungalasihawu kuzakuba kulowo obengelasihawu. Isihawu sinqoba ukwahlulela!

Ukukholwa lezenzo

14 Kusizani bazalwane bami, uma umuntu esithi ulokholo kodwa engelazenzo? Ukholo olunjalo lungamsindisa na? 15 Kasithi umzalwane loba umzalwanekazi kalazigqoko lokudla kwansuku zonke. 16 Uma omunye wenu esithi kuye, “Hamba, ngikufisela okuhle; hlala ukhudumala njalo usutha,” kodwa angenzi lutho ngaleziziswelo zakhe zomzimba, kusizani na? 17 Ngokunjalo, ukukholwa nje kuphela, uma kungelamisebenzi kufile.

18 Kodwa omunye uzakuthi, “Wena ulokukholwa; mina ngilezenzo.” Ngitshengisa ukukholwa kwakho kungelazenzo, njalo mina ngizakutshengisa ukukholwa kwami ngalokho engikwenzayo. 19 Uyakholwa ukuthi kuloNkulunkulu oyedwa. Kulungile! Lamadimoni ayakukholwa lokhu – njalo ayathuthumela.

20 Wena ndoda eyisiwula, ufuna ubufakazi bokuthi ukukholwa okungelamisebenzi kuyize na?

21 Kanje ukhokho wethu u-Abhrahama kabalwanga njengolungileyo ngenxa yalokhu akwenzayo lapho anikela indodana yakhe u-Isaka e-alithareni na? Liyabona ukuthi ukukholwa kwakhe lezenzo zakhe kwakusebenza ndawonye, njalo ukukholwa kwakhe kwapheleliswa yilokho akwenzayo. 22 Njalo umbhalo wagcwaliseka othi, “U-Abhrahama wakholwa uNkulunkulu, njalo kwabalwa kuye njengokulunga,” 23 njalo wabizwa ngokuthi ngumngane kaNkulunkulu.

24 Liyabona ukuthi umuntu ulungiswa yilokho akwenzayo hatshi ngokukholwa kuphela.

25 Ngokunjalo, loRahabi isifebe konje kabalwanga njengolungileyo ngalokho akwenzayo lapho anika izinhloli indawo yokulala wabuya wazikhupha ngenye indlela na?

26 Njengoba umzimba ongelamoya ufile, ngokunjalo ukukholwa okungelamisebenzi kufile.